جايلي عريس :D

جايلي عريس و محدش مضمون
و عماله اعصر علي نفسي لمون
مهو كل مره يجيلي عريس
يوصلني لدرب الجنون
و مع نهايه كل عريس
اكره رجاله مصر وباريس

انا شفت عرسان اشكال و الوان
صنع الصين و صنع اليابان
و كل واحد عاملي فيها
راجل و غضنفر و هو مان

انا جالي واحد جاهز من كله
مش ناقصه سجاده ولا حتي قله
ولما يوم ما قعدت معاه حسيت انه شارب كله
عمال يضحك علي اي حاجه
قلت انا مرارتي مش محتاجه

انا برضه جالي يا امه عريس
كان شكله طعم و خفيف و ونيس
لكن امه مكانش عاجبها الحال
و قالتله يا ابني دي لا محال

ياه ده انا جالي عرسان اشكال و الوان
لكن محستش مع حد فيهم بالامان
وكل واحده تجيبلي عريس
تقلي يابنتي ده سوبرمان
ده عريس يا بنتي ملوش زي
عنده فلوس و لا وزير الري
و عنده فيلا و عنده ميراث
فتحي مخك المحتاس

يا اما ثقافه .. يا اما دين ..
يا ربي هوا مينفعش الاتنين
مخه مش قفل و مفتح
ووشه بشوش و مش متنح
و مش لابسلي قناع الدين
وهو من جوه خبيث ولئيم
و مش فاكرني سنيه الخدامه
دي واالله تبقي جوازه الندامه
يحترم كياني و عقلي وفكري
احطه في عيوني ويلاقي شكري
مش عايزه فلوس ولاحتي قصر
ولا اعيش في اروبا او بره مصر
يا رب اتكلم علي مين ولامين
علي عادل و محمد ولا حسين
دي مواقف و قصص وروايات
في الاخر اقول الطيبون للطيبات
هضيف لسجلي روايه جديدة
يا تكون حزينه يا تكون سعيده

سلمي الريس